Ўзбекистон ташрифи доирасида 17 июнда иккинчи ярмида Жанубий Корея президенти Пак Кин Хэ Ўзбекистон бош вазири Шавкат Мирзиёев ҳамроҳлигида Мустақиллик майдонига ташриф буюрди, дея хабар бермоқда ЎзА.
«Давлатимиз раҳбарининг ташаббуси билан бу ерда амалга оширилган улкан бунёдкорлик ва ободонлаштириш ишлари туфайли Ўзбекистоннинг бош майдони нафақат халқимиз фахру ғурурига хос замонавий қиёфа касб этди, айни пайтда унинг юртимиз ҳаётидаги аҳамияти ҳам юксалди», – дейилади агентлик хабарида.
Жанубий Корея президенти Ўзбекистон халқига ҳурмат-эҳтиромини изҳор этиб, Ўзбекистон мустақиллиги, порлоқ истиқболи, эзгу ниятлари рамзи бўлган Мустақиллик ва эзгулик монументи пойига гул қўйди.
Пак Кин Хэ бу майдон муҳташам бинолари, кўркам боғлари, гўзал фавворалари билан яхлит ансамбль ҳосил қилганини таъкидлади. Бу ерда яратилган меъморий асарлар табиатнинг гўзал инъомлари билан моҳирона уйғунлаштирилгани ўзида катта таассурот қолдирганини алоҳида қайд этди.
Ўзбекистонга 16 июнь куни давлат ташрифи билан келган Жанубий Корея президенти Пак Кин Хэнинг Ўзбекистонга давлат ташрифи давом этмоқда. 17 июнь куни у Самарқандда меҳмон бўлади.
|