Жанубий Корея президенти Пак Кин Хе Ўзбекистонга давлат ташрифининг сўнгги кунида Самарқандда меҳмон бўлди. Бу ҳақда Жанубий Кореянинг Yonhap ахборот агентлиги хабар бермоқда.

Пак Кин Хе Ўзбекистонга 16 июнь куни ташриф буюрганди. 16 июнь куни Тошкентда маҳаллий корейс ҳамжамияти вакиллари билан учрашган бўлса, 17 июнь уни Ўзбекистон ва Жанубий Корея ишбилармон доира вакиллари иштирокидаги бизнес-форумда қатнашди, шунингдек, Ўзбекистон Президенти Ислом Каримов қабулида бўлди.

18 июнь куни Самарқандга ташриф буюрган Пак Кин Хе шаҳарнинг тарихий осори-атиқалари билан танишди, шаҳар тарихидан ҳикоя қилувчи Афросиёб музейида меҳмон бўлди.

Yonhap’нинг ёзишича, ушбу музейда сақланаётган милоднинг VII асрига оид, «Элчилар хонаси» деворий суратида шоҳ Бахман элчиларни қабул қилаётгани тасвирланган бўлиб, экспертларнинг тахминича, элчилардан икки нафари қадимги корейс давлати – Когурёдан бўлиши мумкин.

Пак Кин Хе 18 июнь куни Самарқанддан Қозоғистонга учиб кетади. Олти кунлик Марказий Осиё турнеси давомида Жанубий Корея президенти Туркманистонда бўлишни ҳам режалаштирган.