Россиянинг НТВ+Футбол телеканали шарҳловчиси Георгий Черданцев билан "Arena Pantanal" стадионининг медиа-марказида кўришдик. Бу шарҳловчи Ўзбекистонда анча таниқли. Шу сабабли ҳам Черданцевдан Uff.uz сайти учун интервью беришини сўрадик. Унинг фикрлари сизни қизиқтириши табиий.
Георгий Черданцев айни пайтда ОРТ телевидениеси учун шартнома асосида ўйинларга шарҳловчилик қилаяпти. Ўзбекистондан эканлигимизни билгач, ота-боболари бир пайтлар Тошкентда ишлагани ҳамда Ўзбекистон пойтахти унга бефарқ эмаслиги ҳақида гапириб берди. Суҳбат чоғида атайлаб Россия футболи ҳақида камроқ сўрадик. Асосан ўзбекистонлик мухлисларни қизиқтирадиган саволлар билан мурожаат қилдик.
Биз ушбу интервьюнинг видеосини тўлиқлигича эътиборингизга ҳавола этамиз. Айрим жойларини матн кўринишда беришни лозим топдик.
- Георгий, сизни Ўзбекистонда яхши билишади. Футбол ишқибозлари НТВ+Футбол телеканалидаги чиқишларингизни кузатиб боришади. Айтингчи, сизлардан бу ерда неча киши ишлаяпти?
- Аввалом бор, шуни айтиб кетай: мен бу ерга НТВ+Футбол телеканалидан келмадим. Сабаби, мундиал ўйинларини бизнинг телкеанал трансляция қилмайдиган бўлди. ОРТ телеканали мендан ўйинларни шарҳлаб боришни илтимос қилишди. Шунинг учун мен бу ердаман. Биз кундузги ва кечки кўрсатувларни олиб борамиз. Бу ерга тўртта суратга олиш гуруҳи билан ташриф буюрганмиз. Ҳар бир шахс ўз ишини қилади.
- Россия - Жанубий Корея термалари ўртасидаги учрашув олдидан фикрингиз қанақа?
- Фақат ижобий. Бу ерда футбол муҳити ҳукмрон. Иқлим ҳам футбол ўйнаш учун жуда мос. Бу нарса футболчиларни руҳлантиради ва янада сергак қилади. Мухлислар ҳам барча учрашувларга келиб, майдондаги жамоаларни қўллаб-қувватлашмоқда. Тўғри, балки бу ерда ташкилотчилик қониқарсиз даражададир, аммо футбол барчасини ювиб кетмоқда.
- Россияда футбол сўнгги йилларда анча ўсмоқда. Бизнинг футболчилар Виталий Денисов ва Одил Аҳмедовлар Премьер-лигада тўп суришмоқда. Сиз мутахассис сифатида улар ҳақида нима дея оласиз? Бу тасодифми ёки ўзбеклар ҳам Россия чемпионатида ўйнаб кетишлари мумкинми?
- Дарҳақиқат, Россия чемпионати савияси анча юқори ва бу ерда Халк даражасидаги футболчилар тўп суришади. Мен уни барчадан ажралиб туради демоқчи эмасман, аммо бошқа юксак савиядаги футболчилар ҳам етарли. Виталий Денисовга келсак: унинг ўйинлари менга маъқул бўлмоқда. Яккакурашлардан тортиб, ҳужумларга қўшилишгача ишончли ўйнамоқда. У замонавий услубни ҳам ўзлаштирган. Шундай экан, ўзбекистонлик футболчилар бизнинг чемпионатда ўйнаб кетишдими, уларни чақиришяптими, демак бунга муносиблар.
- Мусоба олдидан ҳакамликлар борасида анча тортишувлар бўлиб ўтди. Бу ерда эса, Ўзбекистондан ягона бўлган вакил Равшан Эрматов ишламоқда. Биз бу билан фахрланамиз. У тўрт йил аввал ҳам ЖЧда яхши ишлаганди ва бешта ўйинни ўтказган ягона ҳакам бўлганди. Ўтган куни биз унинг Швейцария ҳамда Эквадор термалари учрашувини бошқариб борганини кўрдик. У ҳақида илиқ фикрлар янгради. Бу ҳақида Россия матбуотида нима дейиляпти?
- Шахсан менга Равшан Эрматов жуда ёқади. Унга ҳакамлик фаолиятида омадлар тилаб қоламан. Бу ерда барчаси унинг индивидуал маҳорати эвазига бўлганлигини ҳам таъкидлашим мумкин. Ўзбекистонликлар учун бу фахр эканлигини тушунаман. Сабаби, термангиз ЖЧга чиқа олмаган, бунга ягона овунчоқ сифатида қараш мумкин. Бу табиийдир. Лекин шу нарсани айтмоқчиманки, буни Эрматовга алоқаси йўқ, ФИФА ташкилоти иложи борича, футболи ривожланган давлатлардан ҳакамларни тайинлаши керак. Сабаби, футболи кучсиз бўлган чемпионатлардан яхши ҳакамлар кам чиқади. Шиддатли футбол ўйинларида у ҳакамлар йўқолиб қолади. Ҳозир ҳам биз шунинг гувоҳи бўляпмиз. Шунинг учун Жаҳон чемпионатларида фақатгина энг кучли ҳакамлар ишлаши керак.
- Бизда ўсмирлар, ёшлар терма жамоалари мунтазам ЖЧларда иштирок этиб келмоқда. Аммо, миллий термамиз эса афсуски, мундиалга чиқа олмаяпти. Тўрт йилдан сўнг Россияда ўтадиган Жаҳон чемпионатига Ўзбекистон термаси чиқса, сиз ҳайрон қоласизми?
- Агар собиқ иттифоқ термаларидан кўпроқ жамоалар жаҳон чемпионатига келса, бу ажойиб бўларди. Чунки биз бир-биримизга яқинмиз ва мухлислар ташрифи ҳам муаммо бўлмайди. Мен футбол халқларни бирлаштиришини истардим. Ўзбекистон термасига бўлса, вазифани уддалашни тилаб қоламан. Осиё минтақасида саралаш жуда қийин эканлигини яхши биламан. Ўзбекистон бўлса, мана бир неча маротаба мундиалга жуда яқин келганини исботлаб берди.
- Георгий сизга катта раҳмат. Сизни Тошкентга таклиф қилиб қоламан. Қовун-тарвузлар пишганда келсангиз, меҳмон қиламиз, ўзимизнинг қўлбола паловдан татиб кўрасиз.
- Албатта, сизга ҳам раҳмат.
|
